小Evie人生裡第一次响外面剪頭髮

Evie嘅頭髮都已經好耐冇剪了。因為以前一直都係佢媽媽同佢剪嘅！嫲嫲嘗試過好幾次想同佢剪，但係都唔成功。因為佢會喊得好厲害。佢一喊爺爺嫲嫲就亂晒大腳乜都俾佢，所以一直都同唔到佢剪。本來諗住今日出去同佢去間小朋友嘅飛髮鋪，佢會好啲，但係人哋都未開始同佢飛佢就已經開始喊喇！當人哋想話同佢飛嗰時，佢仲係咁擰個頭，等人哋冇辦法同佢飛。卒之要我同佢姑媽一齊，一個抱住佢，一個㩒住佢個頭，仲要搞咗個幾鐘至飛完個髮。响個過程裡面，我都差啲就要放棄話唔同佢飛架喇。因為我見佢喊得咁慘，又怕太大力hold住佢會整到佢喎！後來見到姑媽好鎮定咁抱住佢，叫佢唔好係咁擰，我先至話恨心啲，今日點都要同佢剪到個短髮至走。之後我就不停咁同佢講話唔駛驚，爸爸响佢身邊，唔會離開佢。點知自己一路講就一路想喊。我知道自己响到講緊大話。本來我話過唔可以扼個女，雖然我係好唔捨得離開佢，但係我一定要將佢留响嫲嫲到我至可以照顧我老婆。我實在冇辦法同一時間去照顧個女同我病咗嘅老婆。其實我唔應該扼佢，但係我咁講時，佢真係會定落嚟，俾人哋同佢剪頭髮。都有可能嗰時佢已經冇力再去掙紮喇！但係點都好，今日終於都mission accomplished。同佢飛咗個好靚嘅髮，Evie之後仲好開心，食午飯都食得特別多。佢差唔多將我嘅雪菜肉絲炆米食晒，我要多加一份餐肉蛋治至夠飽。Evie真係都幾貪靚，佢覺得飛完髮之後靚咗就開心晒。個女開心，我都開心啲！

終於開始了

想咗寫blog好耐，但係一直都冇心情去寫。宜家因為有多餘嘅時間同好想將我諗到嘅嘢記底，所以我嘅blog終於面世了。想寫blog好可能係俾我老婆影響，因為佢會寫blog，而我又會follow。我會追住我老婆嘅blog嚟睇因為我好想知道自己老婆响到諗緊乜。我好蠢，又唔細心，更唔浪漫，好多時都唔知道自己老婆响到諗乜嘢。好容易俾佢嬲咗都唔知。而佢有時又唔識用言語去表達自己，所以我哋就會咁怪咁用blog嚟去向對方表達自己。

但係其實好可能係因為我老婆有咗個大病，我好想俾佢知道我响到諗緊乜嘢！因為有好多時我自己都冇辦法用言語嚟表達我係有幾咁擔心同掛念佢。一嚟我怕我咁樣會俾好多壓力佢，二嚟我又唔想佢要擔心我。我好多時都唔敢响佢面前講我嘅感受。但係佢病，我又好驚。我唔寫吓我嘅感受我怕我自己會有anxiety。

希望而家開始寫blog可以另我舒緩啲，同時又可以俾我老婆知道我係點諗嘅。Just getting started ....